2024-12-27
Close
2024-12-27
श्याम गुप्ता
बारा, २२ कार्त्तिक । सरकारी गाडीको नम्बर प्लेट नैं परिवर्तन गरेर चुनाव प्रचारमा प्रयोग गर्दै आएका बारा निर्वाचन क्षेत्र नम्बर १ का उम्मेदवार तथा खानेपानी मन्त्री उमाकान्त चौधरीले प्रयोग गर्दै आएको सरकारी गाडी तानिएको छ ।
आचारसंहितामा चुनावी प्रचारमा सरकारी स्रोत साधन प्रयोग गर्न नपाइने भए पनि मन्त्री चौधरीले भने मन्त्रालयले उपलब्ध गराएको सरकारी गाडीको नम्बर प्लेट परिवर्तन गरेर निजि (रातो) नम्बर प्लेट राख्दै दुरुपयोग गरे पछि आयोगले गडी नियन्त्रणमा लिएको हो ।
बारा क्षेत्र नम्बर १ बाट प्रतिनिधिसभा सदस्य उम्मेदवार चौधरीले बा.२.झ.५८६१ नम्बरको सरकारी गाडीको नम्बर प्लेट परिवर्तन गरेर बा.१२.च.७४३१ नम्बरको प्लेट राखेर प्रयोग गर्दै आएका थिए ।
आचारसंहिताले सरकारी गाडी प्रयोग गर्न रोक लगाए पछि मन्त्री चौधरीले निजि नम्बर प्लेट राखेर चलाउँने जुक्ती लगाएका हुँन् ।
मन्त्री चौधरीले प्रयोग गरेको उक्त निजि नम्बर मेलम्ची आयोजनाले खरिद गरेको टोयोटा ल्याण्ड क्रुजर प्राडो जिपको हो । उक्त जीप भिए टेक वावाग प्रतिभा ई जे भीको नाममा बाग्मती प्रदेशमा दर्ता छ ।
खानेपानी मन्त्रालय कै प्रयोगमा रहेको उक्त जीपको नम्बर मन्त्री चौधरीले आँफू चढ्ने सरकारी गाडीमा राखेका हुँन् ।
सरकारी गाडीको नम्बर नैं परिवर्तन गरेर प्रयोग गर्दै आएका मन्त्री चौधरी प्रहरी सुरक्षा घेरामा नेपाली कांग्रेसको झण्डा राखेर चुनावी प्रचारमा हिड्ने मन्त्री चौधरीलाई स्कर्टिङ दिने प्रहरी नम्बर प्लेट परिवर्तन भएको सम्बन्धमा अनविज्ञ रहेको र मन्त्री चौधरीले पद र सरकारी गाडीको दुरुपयोग गरेको खबर बाहिरिए पछि आयोगले उनीसित स्पष्टीकरण माँग गरेको खबर प्राप्त भए पछि प्रहरीले थाहा पाएको जिल्ला प्रहरी कार्यालय, बाराका प्रहरी प्रमुख प्रहरी उपरिक्षक होबिन्द्र बोगटीले बताए ।
यता जिल्ला निर्वाचन कार्यालय, बाराका प्रमुख सरोज चौधरीले खानेपानी मन्त्री उमाकान्त चौधरीले सरकारी गाडीको नम्बर प्लेट नैं परिवर्तन गरेर चुनाव प्रचारमा प्रयोग गर्दै आएको गाडी नियन्त्रणमा लिई खानेपानी मन्त्रालयमा फिर्ता पठाए सकेको जानकारी दिए ।
सरकारी गाडीको नम्बर प्लेट नैं परिवर्तन गरेर चुनाव प्रचारमा प्रयोग गर्दै आएका खानेपानी मन्त्री उमाकान्त चौधरीलाई निर्वाचन आयोगले कार्त्तिक ५ गते २४ घण्टे स्पष्टीकरण माँग गरेको थियो ।
