2024-11-25
Close
2024-11-25
अप्पन जनकपुर
नेपालगञ्ज–जनकपुर हवाई उडान सुरु भएको छ । धार्मिक पर्यटन प्रवर्द्धन गर्ने उद्देश्यले आज पहिलोपटक नेपालगन्जदेखि जनकपुर हवाई उडान गरिएको हो ।
नेपालगञ्ज उपमहानगरपालिकाको अनुरोध तथा प्रवर्द्धनात्मक सहयोग एवम् नेपाल एसोसिएसन अफ टुर एण्ड ट्राभल एजेण्ट्स (नाट्टा) बाँकेको समन्वयमा यति एयरलाइन्सले उडान सुरु गरेको हो । पहिलो प्रवर्द्धनात्मक उडान आज दिउँसो २ बजेर ४० मिनेटमा भएको यति एयरलाइन्सले जनाएको छ ।
जनकपुरको जानकी मन्दिर दर्शन गर्न जाने र जनकपुरबाट नेपालगञ्जको बागेश्वरी मन्दिरसहित भारतको अयोध्यास्थित राम मन्दिर दर्शन गर्न आउने धार्मिक यात्रुको सुविधालाई ध्यानमा राखेर नेपालगञ्ज–जनकपुर सिधा हवाई उडान सुरु गरिएको हो ।
जनकपुरका लागि गरिएको पहिलो प्रवर्द्धनात्मक उडानमा लुम्बिनी प्रदेशका सहरी विकास मन्त्री कृष्णा केसी नमुना, बागेश्वरी मन्दिरका मूल महन्त चन्द्रनाथ योगी, नेपालगञ्ज उपमहानगरपालिका नगर प्रमुख प्रशान्त विष्ट, नेपालगञ्ज उद्योग वाणिज्य संघका अध्यक्ष टंकबहादुर धामी लगायतको टोली रहेको नाट्टा बाँके च्याप्टरका अध्यक्ष श्रीराम सिग्देलले जानकारी दिए ।
