2024-12-26
Close
2024-12-26
विपिन यादव
जनकपुरधाम । प्रहरी चौकी गिद्वा तिनकौरियामा हालै सरुवा भएर आएका प्रहरी वरिष्ठ नायव निरीक्षक कुवेर खतिवडाले जनताको शान्ति सुरक्षाका लागि २४ सैं घण्टा खट्ने प्रतिवद्धता जनाएका छन् ।
कार्यालयमै आज स्थानीय राजनीतिक दलका प्रतिनिधि र समाजसेवीहरुसँगको परिचयात्मक कार्यक्रममा प्रहरी वरिष्ठ नायव निरीक्षक खतिवडाले शान्ति सुरक्षा कायम गर्न जसरी खटिनुपर्ने हो, त्यसरी खट्ने (काम गर्ने) प्रतिवद्धता जनाएका हुन् । उनले यस क्षेत्रका जनतालाई भयमुक्त हुन समेत आग्रह गरे ।
प्रहरी वरिष्ठ नायव निरीक्षक खतिवडाले हातेमालो गरेर कुप्रथा हटाउनेदेखि लिएर समाजमा देखिने अनेक विकृतिहरु विरुद्ध अगाडी बढ्न राजनीतिक दलका प्रतिनिधि तथा समाजसेवीहरुसँग आग्रह गरे । उनले मिलेर काम गर्दा शान्ति सुरक्षा कायम हुने विश्वास व्यक्त गरे ।
परिचयात्मक कार्यक्रममा सहभागी राजनीतिक दलका प्रतिनिधि, व्यापारी र समाजसेवीहरुले अपराध न्युनिकरणका लागि कसैको प्रलोभनमा परेर काम नगर्न सुझाएका थिए । उनीहरुले अवैध खुल्ला मदिराको कारोबार रोक्न समेत सुझाव दिए । यस्तै कानुनको उल्लंघन नगरी जनताको भावना अनुसार काम गर्न समेत उनीहरुले आग्रह गरे ।
कार्यक्रममा वडा अध्यक्ष राधेश्याम गोईत, वडा अध्यक्ष शम्भु साह, पूर्व वडा अध्यक्ष विजय गोईत, वडा अध्यक्ष जयराम मण्डल, विभिन्न वडाका सदस्यहरु, समाजसेवी रामलाल दास, दुखी मण्डल, बेचन मण्डल, विभिन्न राजनीतिक दल, स्थानिय, ब्यपारीलगायतको उपस्थिति रहेको थियो ।
