2024-12-26
Close
2024-12-26
जनकपुरधाम । नातिनीको अन्तरजातीय विवाह गराएको भन्दै धनुषामा एक परिवारमाथि गाउँलेले कुटपिट गरेका छन् ।
मिथिला बिहारी नगरपालिका–१० का ९० वर्षीय मुर्ली झा र उनकी श्रीमती कलादेवीमाथि गाउँलेले कुटपिट गरेका हुन् ।
जिल्ला प्रहरी कार्यालय धनुषाका प्रहरी प्रवक्ता प्रहरी नायब उपरीक्षक रञ्जन अवाका अनुसार घटना गत मंगलबार साँझको हो ।
मुर्लीकी बुहारी सरिता झाले परिवारका सदस्यहरूमाथि कुटपिट भएको भन्दै प्रहरीमा उजुरी दिएपछि घटना बाहिरिएको हो ।
गत सोमबार सरिताकी २३ वर्षीया छोरी महिमाले धनुषाधाम नगरपालिकाका प्रहन्द शिवहरेसँग प्रेम विवाह गरेकी थिइन् ।
सोही विषयमा अन्तरजातीय विवाह गराएर सामाजिक सद्भाव बिगारेको भन्दै गाउँलेले वृद्ध दम्पत्तीमाथि कुटपिट गरेको पाइएको प्रहरीले जनाएको छ ।
प्रहरीमा दर्ता भएको उजुरीमा वडासदस्य ४० वर्षीय धर्मकान्त झा, ४० वर्षीय सरोज झा र २० वर्षीय नरेश झाले कुटपिट गरेको उल्लेख छ ।
उनीहरूले विवाह खारेज गर्नसमेत दबाब दिएको पाइएको छ । पीडित परिवारले उनीहरूलाई कारबाही गर्दै सुरक्षा दिन माग गरेको छ ।
उजुरीपछि घटनाबारे अनुसन्धान भइरहेको डीएसपी अवाले जानकारी दिए ।
