2024-11-27
Close
2024-11-27
महोत्तरी । महोत्तरीमा गोली प्रहार गरि एकजनाको सुनको सिक्री लुटपाट गरि आरोपीहरु फरार भएका छन् । गौशाला नगरपालिका ११ भरतपुर खोर घर भएका नेपाली कांग्रेसका नेता विनोद महतोको छोरा ३५ वर्षीय विनय महतो (मुरारी) गौशालाबाट मोटरसाइकलमा घर जाँदै गरेको अवस्थामा साँझ ६ बजेतिर गौशाला नगरपालिका ५ स्थित मरहा खोलामा लुटेरा समुहले उनको कम्मरमुनि गोली प्रहार गरि उनले लगाएको सुनको सिक्री लुटेर भागेको हो ।
घाइते विनय महतो (मुरारी) लाई गौशालास्थित स्वास्थ्य चौकीमा उपचारपछि थप उपचारको लागि हाल प्रादेशिक अस्पताल जनकपुर लगिएको जिल्ला प्रहरी कार्यालय महोत्तरीका प्रवक्ता डिएसपी सन्तुलाल प्रसाद जयसवारले बताए । उनले लुटेरा समुहको पहिचान खुल्न नसकेको बताउदै उनीहरुको खोजी भइरहेको बताए ।
लुटेराहरु दुईजनाको संख्यामा रहेको र मोटरसाइकलमा आएको हाल प्रारम्भिक जानकारी रहेको बताउँदै डिएसपी जयसवारले लुटेरा समुहको व्यापक खोजबिन भइरहेको बताए । उनले सुनकै सिक्री लुट्न गोली प्रहार भएको बताइएपनि अनुसन्धानपछि थप कुरा खुल्ने बताए । 
यता प्रत्यक्षदर्शीहरुले लुटेरा समुहसँग केहिवेर मुरारीको हातापाई भएको बताउँदै दुईजना लुटेरासँग कटुवा पेस्तोल भएको र सिक्री लुट्ननै गोली हानेको बताए । उनीहरुले अन्य मानिसहरु बचाउन खोज्दा लुटेरा समुहले बन्दुक तेर्स्याएर तिमीहरुलाई पनि मार्छु भन्दै भाग्न सफल भएको प्रत्यक्षदर्शीहरुको भनाइ छ ।
मुरारी प्रदेश २–००४प – ५५६८ नं. को डिस्कभर मोटरसाइकल चलाएर घर फर्कदै गर्दा उनीमाथि गोली प्रहार भएको हो । यता लुटेराहरुले चलाएर आएको मोटरसाइकल नम्बर भने खुल्न सकेको छैन । जिल्ला प्रहरीबाट एसपी नकुल पोखरेलसहित विभिन्न चौकीहरुबाट प्रहरीबो टोली लुटेरा समात्न तथा घटनाको अनुसन्धानमा खटिएका छन ।
