2024-11-23
Close
2024-11-23
काठमाडौं । प्रधानमन्त्री केपी शर्मा ओली प्रतिनिधिसभाबाट विश्वासको मत लिँदा दुई तिहाइ समर्थन जुटाउन साना दलहरुसँग पनि छलफल थालेका छन् । पुष्पकमल दाहाल प्रचण्ड नेतृत्वको सरकार ढालेर गत आइतबार प्रधानमन्त्री नियुक्त भएका ओलीले ६ गते प्रतिनिधि सभामा विश्वासको मत लिँदैछन् ।
अहिले ओली नेतृत्वको सरकारमा कांग्रेस एमालेसहित, अशोक राइ नेतृत्वको जसपा र लोसपा पनि सहभागी छ । विश्वासको मत लिनुअघि साना दलहरुसँग पनि छलफल हुने मुख्य सचेतक महेश बर्तौलाले बताए ।
उनले भने, ‘सरकारमा भएकाबाहेक अन्य दलसँग विश्वासको मत लिनुअघि छलफल गर्छौं । जनमत, जसपा नेपालले विश्वासको मत दिनुहुन्छ । राप्रपासँग पनि अपेक्षा गरेका छौं । हामी छलफल गर्छौ ।’
त्यसो त माओवादी केन्द्र, राष्ट्रिय स्वतन्त्र पार्टी, नेकपा एकीकृत समाजवादी, नेमकिपा र जनमोर्चाबाहेक अरु दल कांग्रेस एमाले गठबन्धनको सरकारप्रति सकारात्मक छन् ।’
सरकारमा सहभागी कांग्रेसका ८८, एमालेका ७७, जसपा ७ र लोसपा चार गरेर १७६ सांसदको विश्वासको मत पाउने निश्चित छ । तर, दुई तिहाइ बहुमत जुटाउनको लागि १८४ सांसदको समर्थन आवश्यक छ ।
उपेन्द्र यादव नेतृत्वको जसपा नेपाल र जनमतबाट विश्वासको मत पाउने मुख्य सचेतक बर्तौँलाले बताए । नाउपाले पनि अहिलेसम्म कुनै निर्णय गरेको छैन । तर, अध्यक्ष रञ्जिता श्रेष्ठ र नेता रेशम चौधरीको विवादमा फसेको छ ।
यद्यपी, नाउपाले विश्वासको मत नदिएपनि ५ सांसद भएको जसपा नेपाल र ६ सांसद भएको जनमतले विश्वासको मत दिँदा ओलीलाई विश्वासको मत दिँदा दुई तिहाइ पुग्छ ।
२७५ सदस्यीय प्रतिनिधि सभामा सरकारमा सहभागी बाहेक जनमत र जसपा नेपालले विश्वासको मत दिँदा १८७ सांसदको समर्थन पाउँछन् । यो भनेको प्रधानमन्त्री ओलीलाई दुई तिहाइको लागि पर्याप्त गणित हो ।
जसपा नेपालका सांसद प्रकाश अधिकारीले आफूहरुले सरकारलाई विश्वासको मत दिने बताए । उनले भने, ‘हामी अहिले सरकारमा गएका छैनौं । तर, सरकारबाहिरै भएपनि विश्वासको मत दिन्छौं ।’
त्यसो त यही गठबन्धनको बलमा मधेश सरकार टिकाएको जनमतले पनि विश्वासको मत दिने निश्चित छ । मधेश सरकारको नेतृत्व नै प्राथमिकता रहेकाले केन्द्र सरकारमा नगएपनि आफ्नो समर्थन रहेको जनमतका प्रवक्ता डा. शरद यादवले बताएका थिए ।
यसबाहेक १४ सांसद भएको राप्रपा पनि सरकारले संविधान संशोधनको मुद्दा अघि सारेपछि सकारात्मक छ । त्यसका लागि प्रधानमन्त्री ओलीले अध्यक्ष राजेन्द्र लिङ्देनसँग छलफल गरिरहेका छन् । राप्रपाको प्रवक्ता मोहन श्रेष्ठले विश्वासको मत दिने नदिने भन्ने बिषयमा छलफल भइरहेको बताए ।
उनले भने, ‘हामी छलफलमा छौं । अहिलेसम्म कुनै निर्णय भएको छैन । समय बाँकी छ । हाम्रो चासो सरकार होइन, संविधान संशोधनको कुरा हो ।’उनले कांग्रेस एमालेबीच भएको सात बुँदे सहमति सार्वजनिक नभएको बताए ।
उनले थपे, ‘त्यो सहमति अझै बाहिर आएको छैन । अब सत्तारुढ दलहरुले कसरी लिन्छन्, त्यही अनुसार निर्णय पार्टीले गर्छ ।’
विपक्षमा माओवादी ३२, रास्वपाका २१, नेकपा एसको १०, आजपा, नेमकिपा र जनमोर्चाका एक/एक सांसद विपक्षमा रहने देखिन्छन् । यसबाहेक स्वतन्त्र सांसद डा. अमरेशकुमार सिंह र योगेन्द्र मण्डल पनि खुलेका छैनन् ।
