2025-01-17
Close
2025-01-17
अप्पन जनकपुर
जनकपुरधाम । मधेश प्रदेश सरकारमा सहभागी नेपाली काँग्रेसको सिफारिसमा मधेश स्वास्थ्य विज्ञान प्रतिष्ठानमा डा.रामनरेश पण्डित रेक्टरमा नियुक्त भएका छन् । प्रतिष्ठानका तत्कालीन रेक्टर डा.अंकुर साहलाई जसपा नेपाल नेतृत्वको पूर्ववर्ती सरकारले उपकुलपति बनाएपछि रिक्त सो पदमा ढिलोगरी डा.पण्डित नियुक्त भएका हुन् । डा.पण्डितलाई यसअघि काँग्रेससहितकै जसपा नेपाल नेतृत्वको सरकारले प्रतिष्ठानअन्तर्गतको प्रादेशिक अस्पताल जनकपुरका निर्देशक नियुक्त गरेको थियो । सङ्घीय दरबन्दीबाट स्वास्थ्य सेवामा कार्यरत रहेका डा.पण्डितको काठमाडौंस्थित परोपकार प्रसूति गृहमा सरुवा भएपछि प्रदेश सरकारले सत्ता घटक नेकपा एमालेको सिफारिसमा डा.जामुन सिँहलाई अस्पताल निर्देशक बनाएको छ ।
प्रतिष्ठान ऐनमा उपकुलपतिको सिफारिसमा सहकुलपतिबाट रेक्टर नियुक्त हुने प्रावधान छ । जसअनुसार उपकुलपति डा.साहले डा.पण्डितसहित तीनजनाको नाउँ प्रतिष्ठानका सहकुलपति समेत रहेका प्रदेशका स्वास्थ्य तथा जनसँख्या मन्त्री शत्रुधनप्रसाद सिंहसमक्ष सिफारिस गरेका थिए । सहकुलपति एवम् स्वास्थ्य तथा जनसँख्या मन्त्री सिंहले ती तीन नाउँमध्ये डा. पण्डितलाई रेक्टर पदमा नियुक्त गरेका हुन् । डा.पण्डित नेपाली काँग्रेसनिकट रहँदैआएका छन् । उनकी पत्नी अन्जना पण्डित नेपाली काँग्रेसका तर्फबाट मधेश प्रदेशसभा सदस्य हुन् । नेपाली काँग्रेस मधेश प्रदेशको कार्यालय जनकपुरधामस्थित डा.पण्डितकै घरमा सञ्चालन हुँदैआएको छ ।
‘राजनीतिक नियुक्तितर्फ रिक्त पदहरूमा सरकारमा सहभागी दलका हिस्सेदारी हुनेगरी नै सहमति भएको छ । त्यसअनुसार रेक्टर र अस्पताल निर्देशक पदमा सरकारमा सहभागी ठूला दुई दल नेपाली काँग्रेस र नेकपा एमालेले दाबी गरेका थिए । केही महिनाअघि अस्पताल निर्देशकमा डा.सिंह र रेक्टरमा डा.पण्डितको नियुक्ति त्यसै सहमतिअनुसार भएको हो,’ सरकारका एक अधिकारीले भने ।
उनका अनुसार सरकारको नेतृत्व गर्ने दल जनमत पार्टी र मुख्यमन्त्री सतिश कुमार सिंहले रेक्टरका लागि अरू नै व्यक्तिलाई नियुक्त गर्ने अडान लिएपछि काँग्रेसबाट सिफारिस भएका डा.पण्डितको नियुक्ति केही समय रोकिएको नै थियो । तर, डा.पण्डितको नियुक्तिका लागि काँग्रेसले कडा अडान लिएपछि संयुक्त सरकार सञ्चालन सहज बनाउन मुख्यमन्त्री सिंह प्रतिष्ठानका सहकुलपति एवम् स्वास्थ्य तथा जनसँख्या मन्त्री सिँहको निर्णयमा सहमति जनाउन बाध्य भएका थिए ।
यसअघि अस्पताल निर्देशक हुँदा डा.पण्डितसहितको टोलीले प्रतिष्ठानमा एमबिबिएस सञ्चालनका लागि विभिन्न पदपूर्तिका लागि लिइएको परीक्षामा अनियमितता देखिएको भन्दै प्रदेश सरकारका प्रमुख सचिव लोकनाथ पौड्यालले प्रतिष्ठानलाई पत्र लेखी परीक्षा रद्द गर्न तथा त्यसमा संलग्न अधिकारीलाई कारबाही गर्न सिफारिस गरेको थियो । तर, अनियमितताको तथ्यपूर्ण एवम् विस्तृत विवरणबिना नै परीक्षा रद्द तथा अधिकारीलाई कारबाही गर्न नसकिने भन्दै प्रतिष्ठान प्रशासनले प्रमुख सचिव पौड्यालसँग त्यससँग सम्बन्धित तथ्य तथा निष्कर्षसहित विश्लेषण माग गरेको थियो ।
प्रदेशको राजधानी जनकपुरधाममा सरकारी स्तरमा एमबिबिएस पढाइलाई रोक्ने समूहले प्रतिष्ठानमा एमबिबिएस पठानपाठनको पूर्वाधार रोक्न विभिन्न किसिमको षड्यन्त्र गरिरहेका बेला ती समूहकै गोटीका रूपमा अपुष्ट कारणबिना प्रमुख सचिव पौड्यालले कर्मचारी भर्ना रोक्न लगाएको आरोप लगाइएको थियो । परीक्षा रद्द गर्नुपर्ने तथा परीक्षामा संलग्न कर्मचारीलाई कारबाही गर्ने विषयमा प्रतिष्ठानले माग गरेको आधारबारे प्रमुख सचिव पौड्यालले अझै कुनै पनि जानकारी गराएको छैन ।
प्रतिष्ठानका एक कर्मचारीका अनुसार गहिरो अनुसन्धान हुने हो भने प्रतिष्ठानमा एमबिबिएस पठनपाठन रोक्न प्रमुख सचिव पौड्यालले सनकका भरमा गलत तथा भ्रामक तथ्य प्रसार हुनेगरी परीक्षा रद्द एवम् कर्मचारीमाथि कारबाही गर्ने सिफारिस गरेको प्रमाणित हुने बताए । उनले भने, ‘सनक र लहडको भरमा कुनै प्रक्रिया कसैले रोक्न मिल्दैन । त्यसका लागि पर्याप्त आधार चाहिन्छ । तर, प्रमुख सचिवले प्रतिष्ठान कर्मचारीको मनोबल नै गिराउनेगरी त्यस्तो पत्र लेखिएको देखियो ।’
प्रमुख सचिव पौड्यालको सरुवा कर्णाली प्रदेशमा भइसकेको छ ।
