2025-04-04
Close
2025-04-04
अप्पन जनकपुर
जनकपुरधाम । मधेश प्रदेशका मुख्यमन्त्री सतिशकुमार सिँह जनकपुरधामका होटलहरूको भान्सासम्म पुगेका छन्—बुलेट मोटरसाइकल चढेर, हातमा हेल्मेट र मनमा सुधारको संकल्पसहित । सोमबार उनले एकैदिन नौ वटा होटलको अनुगमन गर्दै खाद्य सुरक्षासम्बन्धी गम्भीर लापरवाही सार्वजनिक गरेका छन् ।
पहिलो दिन आइतबार १० होटलको अनुगमन गरेका सिँहले दोस्रो दिन जनकपुरधामको प्रमुख व्यावसायिक क्षेत्रका होटल र नास्ता पसलहरूमा पुगेर सरसफाइ, भान्साको अवस्था, खाद्य भण्डारण र उपभोग्य वस्तुहरूको म्यादलगायतका पक्ष गहन रूपमा निरीक्षण गरे । अनुगमनपछि उनले केही होटलहरू देखावटी सफाइमा सीमित रहेको, तर भान्साघरमा भने अवस्था नाजुक रहेको बताए ।
ग्राहक बस्ने ठाउँ जति सफा देखिन्छ, भान्सामा त्यति नै अव्यवस्था छ । हामीले सुधारको आग्रहसहित अनुगमन गरिरहेका छौं । तर कानुनको उल्लंघन भएमा होटल बन्द गर्नेसम्मको कदम चाल्न पछि हट्दैनौं, मुख्यमन्त्री सिँहले स्पष्ट रूपमा चेतावनी दिए ।
उनको नेतृत्वमा गरिएको संयुक्त टोलीमा भूमि व्यवस्था, कृषि तथा सहकारी मन्त्रालय, जिल्ला प्रशासन कार्यालय, खाद्य प्रविधि तथा गुणस्तर नियन्त्रण कार्यालय, साना उद्योग तथा घरेलु कार्यालय र जनकपुर उद्योग वाणिज्य संघका प्रतिनिधिहरू सहभागी थिए ।
अनुगमनका क्रममा शिवचौकस्थित न्यु राधा होटल र छपरिया नास्ता पसलमा अत्यधिक ग्राहक हुने भए पनि सरसफाइको अवस्था कमजोर देखिएको थियो । ती होटलहरूबाट नष्ट गरिएको खाद्य सामग्रीमा २० लिटर तेल, प्याज, समोसा र लिटी समावेश छन् । दुवैलाई अन्तिम चेतावनी दिँदै मापदण्डअनुसार सुधार गर्न निर्देशन दिइएको छ ।
त्यस्तै, जनकचौकस्थित होटल फिल इट र मिथिला यात्री निवासमा शाकाहारी र मांसाहारी खाना छुट्टाछुट्टै नराखिएको, भान्साकोठा अस्वच्छ रहेको पाइएपछि ब्रेड, ब्रेडरोटी र मासु नष्ट गरिएको हो । लक्ष्मी मिष्टान्न भण्डारमा त म्याद गुज्रिएको च्याउमिन र बिग्रिएको बर्फीसमेत भेटिएपछि तत्कालै नष्ट गराइएको छ ।
साना उद्योग तथा घरेलु कार्यालयका प्रमुख सन्तोष साहका अनुसार अनुगमन गरिएका नौ होटलमध्ये एकमात्र होटलको अवस्था सन्तोषजनक देखिएको हो। उनले स्पष्ट रूपमा भने, भान्साघर व्यवस्थापनमा गम्भीर लापरवाही दोहोरिए होटल बन्द गराउनुपर्ने अवस्था आउन सक्छ ।
मुख्यमन्त्री सिँहले जनकपुरधामको पर्यटकीय महत्त्व र आन्तरिक पर्यटनको विकासका लागि स्वच्छता र खाद्य सुरक्षामा कुनै सम्झौता नहुने बताएका छन् । साथै, होटलमा विक्री वितरण हुने खाद्य सामग्रीको मूल्य व्यवस्थापनसमेत गर्न प्रदेश सरकारले सम्बन्धित निकायसँग समन्वय गर्ने तयारीमा रहेको उनले जानकारी दिए ।
