2024-11-25
Close
2024-11-25
प्रमुख समाचार
जनकपुरधाम,१३ मंसिर ।रामजानकी विवाहोत्सवको भव्य तयारीसँगै जनकपुरमा शान्ति सुरक्षा कडा पारिएको छ । महोत्सवमा सहभागी हुने भीभीआईपी तथा श्रद्धालुको सुरक्षाका लागि पाँचजना एसपी र १३ जना डीएसपीको कमाण्डमा करिब ४ हजार सुरक्षाकर्मी परिचालन गरिएको जिल्ला प्रहरी कार्यालय धनुषाले जनाएको छ । राष्ट्रपति विद्यादेवी भण्डारीसँगै नेपाल तथा भारतका अधिकारी तथा साधुसन्तको सुरक्षार्थ व्यापक सुरक्षाकर्मी परिचालन गरिएको प्रहरी नायव उपरिक्षक रामेश्वर कार्कीले जानकारी दिए ।
विष्फोटक पदार्थ नियन्त्रणका लागि तालिम प्राप्त कुकुरसहितको सुरक्षा टोली जनकपुर सहित भारतीय सीमा क्षेत्रमा समेत परिचालन गरिएको उनले बताए । यस्तै जनकपुरमा मेलाको रुपमा जम्मा हुने हजारौको भिडमा चोरी तथा लुटपाट हुन सक्ने घटना नियन्त्रणका लागि पनि जिल्ला प्रहरी कार्यालयले प्रभावकारी योजना बनाएर कार्यान्वयनमा लागेको छ । यसका लागि विभिन्न चोक तथा सार्वजनिक स्थानमा एक सय थान सिसिटिभी क्यामेरा जडान गरिएको छ । यस बाहेक १२ वटा समूह बनाएर सादा पोशाकको सुरक्षाकर्मी पनि परिचालन गरिएको छ । रातिको समयमा पनि सुरक्षा चुनौति आउने सक्ने तथा विभिन्न अपराधिक घटना हुनसक्ने सम्भावित परिस्थितिलाई नियन्त्रण गर्न सुरक्षाकर्मीहरुलाई रात्रीबासका लागि पनि नगरभरी छरिएर बस्नेगरी व्यवस्था मिलाइएको छ । सुरक्षाकर्मी बस्न जनकपुर नगर क्षेत्रभित्र रहेका ११ वटा सामुदायिक विद्यालयमा व्यवस्था मिलाइएको उनले बताए । यी बाहेक धर्मशाला तथा मठ मन्दिरहरुमा पनि सुरक्षाकर्मी तैनाथ रहनेछन् ।
