2025-01-16
Close
2025-01-16
अप्पन जनकपुर
जनकपुरधाम – नयाँ कर्मचारी भर्नाको आवेदन खुलाएपछि करार शिक्षकहरुले राजर्षि जनक विश्वविद्यालयमा तालाबन्दी गरेका छन् ।
विगत ६ महिनादेखि जारी आन्दोलनलाई बेवास्था गर्दै विभिन्न पदमा कर्मचारी माग गरेको भन्दै सेवा आयोगमा तालाबन्दी गरिएको हो ।
शिक्षकहरुले आफ्नो करार नियुक्ति नविकरण गर्न माग गर्दै विश्वविद्यालयको प्रशासन, उपकुलपति र रजिष्ट्रारको कार्यालयमा तालाबन्दी गरेका हुन् ।
पेपर (कोर्ष) कन्ट्रायक्ट शिक्षक संघका अध्यक्ष दिलिप कुमार यादवले सेवा आयोगको कार्यालयमा समेत तालाबन्दी गरेको जानकारी दिँदै र माग पुरा नगरी ताला नखुलाउने उनले बताए ।
विश्वविद्यालय सेवा आयोगले विभिन्न पदमा २१ कर्मचारीका लागि विज्ञापन गरेको छ ।
संघका अध्यक्ष यादव भन्छन्, ‘२६ कर्मचारीको दरबन्दी रहेकोमा मात्र २१ जनाको मात्र विज्ञापन गरिएको छ । यसमा आपत्ति छ नै । अनी हाम्रो योगदानलाई कदर गर्दै एक पटकका लागि कम्तिमा उमेर हद नलाग्ने सुविधा दिनुपर्थ्यो । तर त्यसो समेत नगरेकाले सेवा आयोगमा ताला लगाएका छौं ।’
सेवा आयोगका अध्यक्ष प्रा. डा. शैलेन्द्र लाभ कर्ण र सदस्य अनिल साहलाई पटक पटक मौखिक जानकारी गराउँदै आइरहेपनि आफूहरुको माग सम्बोधन नगरेको उनले गुनासो गरे ।
आयोगद्वारा अपारदर्शि ढङ्गले विज्ञापन गरी उत्कर्षमा पुगेको आन्दोलनलाई विथोल्ने प्रयास गरिएको उनको भनाई छ ।
