2024-11-25
Close
2024-11-25
काठमाडौं । नेकपा एमालेका पोलिटव्यूरो सदस्य एवं सांसद महेश बस्नेतले सरकारले देश र जनताको मुटुको रुपमा काम गर्न नसकेको बताएका छन् ।
प्रतिनिधि सभा बैठकमा बजेटमाथि जारी छलफलमा बोल्दै सांसद बस्नेतले उद्योगी व्यापारी र व्यवसायीहरु अहिले निराश भएको बताए । उनले अर्थतन्त्र अलसर र ग्याष्ट्रिक मात्र नभइ क्यान्सर हुने अवस्थामा पुगेको बताउँदै बैंकहरु टाट पल्टिने अवस्थामा पुगेको बताए । उनले भने, ‘विद्यालयहरु पाठ्यपुस्तक नभएर बन्द हुने अवस्थामा छन्, किसानहरु मलको अभावमा आउँदो बर्ष खेती गर्ने कि नगर्ने भनी सोच्न थालेका छन् । डिग्री हासिल गरेका विद्यार्थीहरु म्यादी प्रहरीमा जागिर खान बाध्य भएका छन् । अछान, वर्दिया जस्ता ठाउँमा जनताहरु आफ्ना अधिकारका लागि आन्दोलन गरिरहेका छन् भने सरकारले गोली प्रहार गरिरहेको छ ।’
सांसद बस्नेतले अहिले दिनप्रतिदिन महिला हिंसा बढिरहँदा गृहमन्त्रालय बेखबर रहेको बताए । उनले पेट्रोलियम पदार्थको मूल्यबृद्धि १५ पटक भन्दा बढी पटक बढेको बताउँदै अहिलेसम्मकै सबैभन्दा बढी मूल्यबृद्धि भएको बताए ।
काठमाण्डौमा फोहरको थुप्रिदै गर्दा पनि सरकारले यसको उचित सम्बोधन गर्न नसकेको भन्दै सांसद बस्नेतले विगतमा विद्यासुन्दरलाई गाली गर्नेहरुले पनि विगत ५ बर्षसम्म फोहर व्यवस्थापन गरेका रहेछन् भनेर प्रशंसा गर्न थालेको बताए । उनले बञ्चरे डाँडाका जनताले आन्दोलन गरिरहँदा सरकार फोहर मैलाको व्यवस्थापन गर्नुको साटो उनीहरुमाथि लाठी चार्ज गरिरहेको बताए ।
विनियोजन विधेयकमाथि संसदमा छलफल चलिरहँदा सरकारका मन्त्रीहरु व्यस्त भएको बताउँदै सांसद बस्नेतले सम्बन्धित मन्त्रीहरु आफ्नो पद कसरी जोगाउने भन्ने चिन्तामा रहेको बताए । उनले भने, ‘उहाँहरुको व्यस्तता सरकार टिकाउने कुरामा छ, उहाँहरुको व्यस्तता गठबन्धन जोगाउने कुरामा छ, उहाँहरुको व्यस्तता प्रमुख प्रतिपक्षलाई कमजोर बनाउने कुरामा छ । मन्त्रीहरु अहिले नेता र प्रधानमन्त्रीको घरतिर हुनुहोला, किनभने भइरहेका मन्त्रीलाई पद जोगाउनु परेको छ । मन्त्रीको लाइनमा बस्नुभएका सांसदहरुलाई नयाँ मन्त्री चाहिएको छ । यहाँ हामीहरु विनियोजन विधेयकमाथिको महत्वपूर्ण छलफलमा छौं तर यहाँ सरकारका मन्त्रीहरु हामीले देखिरहेका छैनौं ।’
