जनकपुरधाम । भारतीय सिमानासँग जोडिएको मधेश प्रदेशका जिल्लामा सीमा स्तम्भहरुको मर्मत सम्भार र रङरोगन गरिएको छ ।
सीमा सुरक्षामा खटिएका सशस्त्र प्रहरीले भारतसँग जोडिएको मधेश प्रदेशको सिमाना रहेका ९८३ सीमास्तम्भको मर्मत सम्भार र रङरोगन पूरा गरेको हो । गएको कात्तिक १६ गतेदेखि वैशाख ३ गतेसम्म चलाइएको अभियानअन्तर्गत २९६ सीमास्तम्भको रङरोगन, ६४६ वटाको सामान्य मर्मत, ३६ वटाको मध्यम स्तरको मर्मत र पाँचवटा स्तम्भको पूर्ण मर्मत गर्ने काम सम्पन्न भएको सशस्त्र प्रहरी मधेश प्रदेशको मुख्यालय बर्दिबास महोत्तरीले जनाएको छ ।बाँकी बिजोड नम्बरका ९१ वटा सीमा स्तम्भमा विवाद देखिएको र दुवै देशका सीमा सुरक्षा अधिकारीलगायत सरोकारवालाहरुसँगको छलफल र सहमतिपछि मर्मत-सम्भार र रङरोगन गरिने बताइएको छ ।
भारतसँग जोडिएको मधेश प्रदेशको झन्डै ४६१ किलोमिटर सिमानामा २२७ वटा ठुलो जंगेपिलर, ५८४ वटा सहायक, तीन हजार दुई सय चारवटा सानोलगायत चार हजार २७ वटा पिलर रहेको सशस्त्र प्रहरीले जनाएको छ ।
