2025-01-29
Close
2025-01-29
अप्पन जनकपुर
बारा । ईलाका प्रहरी कार्यालय सिमराको हिरासतबाट आइतवार बिहान एक जना थुनुवा फरार भएका छन् । अभद्र व्यवहार मुद्दामा थुनामा रहेका जीतपुरसिमरा उपमहानगरपालिका-२ का महेश चौधरी फरार भएको जिल्ला प्रहरी कार्यालय बाराले जनाएको छ ।
प्रहरीका अनुसार चौधरीलाई रातभर हिरासतमा जम्मा भएको फोहर फाल्न लगाइएको थियो । उक्त क्रममा ड्युटीमा रहेका प्रहरीले ध्यान नदिँदा उनले मौका छोपेर फरार भएका हुन् ।
प्रहरी नायब उपरीक्षक एवं बारा प्रहरीका प्रवक्ता प्रकाश सापकोटाले सामान्य प्रकृतिको मुद्दा भएको कारण प्रहरीले आवश्यक सतर्कता अपनाउन नसकेको स्वीकार गरेका छन् । प्रवक्ता सापकोटाका अनुसार चौधरीको खोजी कार्य जारी छ ।
थुनुवालाई पक्राउ गर्न बाराका विभिन्न स्थानमा खोजी अभियान सञ्चालन भइरहेको प्रहरी स्रोतले जनाएको छ । यस घटनाले हिरासत व्यवस्थापनमा लापरबाही र सुरक्षाको कमजोरीप्रति प्रश्न उठाएको छ ।
सामान्य मुद्दामा थुनामा रहे पनि फरार थुनुवाले अन्य अपराधमा संलग्न हुन सक्ने आशंका गर्दै प्रहरीले थप सतर्कता अपनाउने प्रतिबद्धता जनाएका छन् ।
