2025-03-12
Close
2025-03-12
अप्पन जनकपुर
काठमाडौं । नागरिक उन्मुक्ति पार्टी (नाउपा) का संरक्षक रेशम चौधरीले जनमत पार्टीसँगको एकताको शुभखबर चाँडै सुन्न पाइने बताएका छन् ।
‘जनमत पार्टीसँगको एकताको शुभखबर चाँडै सुन्न पाउनुहुन्छ, डा. साहेबसँग कुराकानी भइरहेको छ,’ संरक्षक चौधरीले भने । उनले नाउपा र जनमतका बीचमा त्यति धेरै फरक विचाधारा नभएकाले पनि मिल्न सजिलो हुने बताए। ’हामी विचारधाराका हिसाबले पनि समान छौँ । अरु कुराहरू पनि समान नै छन् ।
हामी दुबै आन्दोलनबाट आएका हौँ। दुबै जेलनेल बसेका हौँ देश र जनताका लागि। दुबै युवा हौँ, त्यही कोणबाट कुराहरू गर्छौँ र बुझ्छौँ । त्यसो भए किन फरक–फरक बस्ने त भनेर हामीले एकताका लागि संवाद अगाडि बढेका छौँ,’ उनले भने । चौधरीले नाउपा अध्यक्ष रञ्जिता श्रेष्ठ चौधरी देशबाहिर रहेको र उनी फर्केपछि एकताका लागि अन्तिम संवाद हुने बताए ।
सङ्गठनात्मक रूपमा एकीकृत पार्टीको नेतृत्व कसले गर्छ ? भन्ने जिज्ञासामा उनले त्यसमा विवाद नै नहुने जिकिर गरे। ’डा.साबसँग कुरा हुँदा त मैले तपाईं गर्नुस् भन्ने र उहाँले तपाईं गर्नुस् भन्ने भइरहेको छ। त्यसमा विवाद हुँदैन। हामीले पदभन्दा पनि जनताको सेवालाई मुख्य मानेका छौँ,’ उनले भने । उनले यसअघि गत माघ २७ गते नेसपा (नयाँ शक्ति) को पहिलो महाधिवेशनको खुल्ला सत्रमा डा. सीके राउत नेतृत्वको जनमतसँग चाँडै एकता हुने बताएका थिए ।
