2025-04-14
Close
2025-04-14
वडाध्यक्ष र सचिवलाई भने जोगाउन खाेजिएकाे स्थानीयकाे आशंका
जनकपुरधाम । नक्कली बुवा बनेर भारतीय नागरिकलाई नागरिकता बनाइदिएको आरोपमा सिरहा प्रहरीले एक जनालाई पक्राउ गरेको छ ।
पक्राउ पर्नेमा नरहा गाउँपालिका ३ का अमानत मियाँ छन् । उनलाई मंगलबार पक्राउ गरेको सिरहाका प्रहरी प्रमुख रमेश पण्डितले पुष्टि गरेका छन् । यो प्रकरणमा केही व्यक्ति फरार रहेको बताए ।
भारत विहार राज्यको मधुवनी जिल्ला जयनगर ग्रामपञ्चायत देउधा टोलका मोसताक मियाँले अमानतलाई बुवा बनाएर जिल्ला प्रशासन कार्यालयबाट नेपाली नागरिकता बनाएको समाचार नेपाल प्रेसले प्रकाशित गरेको थियो ।
मोसताकलाई नेपाली नागरिकता बनाइदिन नरहा गाउँपालिका-३ का वडाध्यक्ष रुस्तम अन्सारी र वडासचिव रामदेव मण्डलको पनि मिलेमतो रहेको स्थानीयको आरोप छ । स्थानीयले उनीहरूमाथि आर्थिक लेनदेन गरी भारतीयलाई नागरिकताका लागि सिफारिस गरेको आरोप लगाउँदै स्थानीयले जिल्ला प्रशासन र अख्तियार दुरुपयोग अनुसन्धान आयोगमा उजुरी समेत दिएका छन् ।
उजुरी परेको लामो समयसम्म प्रशासनले अनुसन्धान तथा कारवाही अगाडी नबढाएपछि स्थानीयले नेपाल प्रेससँग सम्पर्क गरेका थिए । समाचार आएपछि जसपा नेपालका सांसद राजकिशोर यादवले सदनमा पनि कुरा उठाए ।
प्रहरीले बल्ल नक्कली बुवा बनेका अमानतलाई पक्राउ गरेको छ । तर, नागरिकताका लागि सिफारिस दिने वडाध्यक्ष र वडासचिवलाई प्रशासनले बचाउने खेलमा लागेको स्थानीयको आरोप छ ।
