2025-04-03
Close
2025-04-03
सन्तोष यादव
जनकपुरधाम । सिरहाको गोलबजार नगरपालिका ९ की १३ वर्षीया गुलशना खातुनको शव गाडिएको अवस्थामा शव फेला परेको छ ।
गत फागुन २९ गते घरबाट निस्केकी खातुनको शव बोरामा बेरेर गाडिएको अवस्थामा ईलाका प्रहरी कार्यालय मिर्चैयाको टोलीले फेला पारेको छ ।
‘वनमारा झाडीभित्रबाट लास कुहिएको गन्ध आएपछि गाउँमा आशंका जाग्यो’, गोलबजार ९ का पूर्ववडाध्यक्ष रामपुकार कामतीले भने, ‘हामीले प्रहरीलाई खबर गर्यौं । प्रहरीको टोलीले उत्खनन गर्दा बालिका खातुनको शव भेटियो । शव बोरामा बेरिएर खाडलभित्र पुरिएको थियो ।’
खालडभित्र फेला परेको शव खातुनकै रहेको इलाका प्रहरी कार्यालय मिर्चैयाका प्रहरी नायब उपरीक्षक सन्तबहादुर बाखुले जानकारी पुष्टि गरेका छन् । उनका अनुसार घुर्मी खोला किनारमा तीन फिट खनेपछि जुटको बोरामा बेरिएको अवस्थामा बालिकाको शव फेला परेको छ ।
उनले घटनाबारे थप अनुसन्धान भइरहेको जानकारी दिए ।
आमा जाहेदा खातुनले ईलाका प्रहरी कार्यालय मिर्चैयामा चैत १ गते खोजतलास गरिदिन भनेर निवेदन दिएकी थिइन् । खातुन स्थानीय सामुदायिक विद्यालयमा कक्षा ४ मा अध्ययनरत थिइन् ।
