2025-04-03
Close
2025-04-03
जनकपुरधाम । धनुषाको विदेह नगरपालिकामा रहेको श्री जनता नमूना मावि गिद्वा-बेलापट्टी जो मधेश प्रदेशकै सबैभन्दा बढी विद्यार्थी संख्या भएको विद्यालय हो र देशभरिमा दोस्रो स्थानमा पर्छ, त्यहाँ परीक्षा केन्द्र सञ्चालन भइरहे पनि नियमित कक्षा प्रभावित भएको छैन ।
विद्यालयका प्रधानाध्यापक पवन कुमार मण्डलका अनुसार अन्य विद्यालयहरू परीक्षाका कारण प्रभावित भए पनि जनता नमूना माविले व्यवस्थित रूपमा परीक्षा तथा कक्षा दुवै सञ्चालन गरिरहेको छ । परीक्षा केन्द्रमा मावि खजुरी, मावि माची, मावि मडान, र मावि बफैका परीक्षार्थीहरू सहभागी भएका छन् ।
यस पटकको परीक्षामा जम्मा २४६ विद्यार्थी सहभागी भएका छन्, जसमा ११८ छात्र र १३७ छात्रा छन्, भने ९ विद्यार्थी अनुपस्थित रहेका छन् । ग्रेड वृद्धि तर्फ ३९ जना परीक्षार्थी छन् भने नियमित परीक्षार्थीको संख्या २५५ रहेको छ। परीक्षा पूर्ण रूपमा शान्तिपूर्ण रूपमा सम्पन्न भइरहेको प्रधानाध्यापक मण्डलले जानकारी दिए ।
विद्यालय प्रशासनले परीक्षा समयमा कक्षा सञ्चालनलाई समेत प्राथमिकता दिएको छ । बिहान परीक्षा सकिएपछि ११:३० बजेबाट कक्षा सञ्चालन गरिँदै आएको छ । यस क्रममा घण्टीको समय ४० मिनेट मात्रै राखिएको छ ।
साथै, लिजर घण्टीमा रहेका शिक्षकहरूलाई पहिलो घण्टीको जिम्मेवारी दिइएको छ ।
विद्यालयमा हाल ६००१ विद्यार्थी दर्ता छन्, जसमा हाल ४५०० देखि ५००० विद्यार्थी नियमित रूपमा विद्यालय आइरहेका छन् ।
विद्यार्थीहरूको नियमित उपस्थितिलाई अझ प्रभावकारी बनाउन विद्यालयले विभिन्न कार्यक्रमहरू सञ्चालन गरिरहेको छ ।
विद्यार्थीलाई नियमित रूपमा विद्यालयमा ल्याउन विद्यालय व्यवस्थापनले विभिन्न कार्यक्रम सञ्चालन गर्दै आएको छ । जसअनुसार फनिङ कार्यक्रम,सेमिनार कार्यक्रम,कक्षागत अभिभावक भेलाले नियमित रूपमा नआउने विद्यार्थीको अभिभावकलाई बोलाएर काउन्सिलिङ साथै, विद्यालयमा कक्षा व्यवस्थापन समिति गठन गरिएको छ, जसले विद्यार्थीको नियमित उपस्थितिलाई बढावा दिनका लागि विभिन्न कार्यक्रमहरू गर्दै आएको छ ।
विद्यालय प्रशासनको यस्तो व्यवस्थापनले विद्यार्थीको सिकाइ प्रभावकारी बनाइरहेको छ भने परीक्षाको समयमा पनि पठनपाठनलाई निरन्तरता दिन सकिएको छ ।
