2025-04-01
Close
2025-04-01
वीरगञ्ज । बाराको कलैया उपमहानगरपालिका-१ स्थित तरकारी बजारमा रहेको हनुमान मन्दिरको दान पेटिकाबाट दानको रकम चोरी भएको छ ।
मन्दिरको मूल गेटको ताल्चा फुटाएर अज्ञात व्यक्तिहरूले दान पेटिकाबाट करिब १० हजार रुपैयाँ बराबरको रकम चोरेको प्रहरीले जनाएको छ ।
बारा प्रहरीका प्रवक्ता प्रहरी नायव उपरीक्षक (डिएसपी) प्रकाश सापकोटाले दिएको जानकारीअनुसार चोरी रातिको समयमा भएको प्रहरीको अनुमान छ । बिहान मन्दिरका पुजारी पूजा गर्न जाँदा दान पेटिका खोलिएको र रकम चोरी भएको फेला परेपछि प्रहरीलाई खबर गरिएको थियो ।
घटनाको जानकारी प्राप्त हुनासाथ जिल्ला प्रहरी कार्यालय बाराले तत्काल एक टोली खटाएर अनुसन्धान सुरु गरेको छ । डिएसपी सापकोटाले सत्य तथ्य बुझेर अपराधीलाई पत्ता लगाई छिट्टै कानुनी दायरामा ल्याउने प्रतिबद्धता व्यक्त गरेका छन् ।
स्थानीय बासिन्दाहरूले मन्दिरजस्तो पवित्र स्थलमा भएको चोरीको घटनाप्रति आक्रोश व्यक्त गरेका छन् । प्रहरीले घटनास्थलको निरीक्षण गरी आवश्यक प्रमाण सङ्कलन गरिरहेको छ । थप अनुसन्धान जारी रहेको प्रहरीले बताएको छ ।
