2025-04-03
Close
2025-04-03
अप्पन जनकपुर
जनकपुरधाम । मधेश प्रदेश सरकारले प्रदेश लोकसेवा आयोगमार्फत छनोट भएका सहायक पाँचौँ तहका स्टाफ नर्सहरूलाई सिफारिस गरेको दुई महिना वित्न लाग्दा पनि पदस्थापन प्रक्रिया अझैसम्म टुंगो लाग्न सकेको छैन ।
गत माघ १९ गतेको सूचना अनुसार स्वास्थ्य सेवा, जनरल नर्सिङ समूह, सहायक पाँचौँ तहका १२ जना स्टाफ नर्सहरूलाई स्वास्थ्य तथा जनसंख्या मन्त्रालयमा स्थायी नियुक्तिका लागि सिफारिस गरेको थियो । तर सिफारिस गरेको दुई महिना वित्दा पनि पदस्थापन हुन नसक्दा उनीहरु अन्योलमा छन् ।
प्रदेश लोकसेवा आयोग मधेश प्रदेशले आर्थिक वर्ष २०७९/०८० मा खुलाएको विज्ञापनमा स्वास्थ्य सेवा, जेनेरल नर्सिङ समूह, सहायक पाँचौं तह, स्टाफ नर्स पदको संख्या माग गरेको थियो । जसबाट १२ जना छनोट भइ सिफारिस भएका थिए । तर ती १२ जनालाई मन्त्रालयले सिफारिसको डेढ सातापछि मात्र नियुक्ति पत्र दिएको थियो ।
नियुक्ति पाएका नर्सहरू भने करिब दुई महिनादेखि मन्त्रालयमा नै हाजिरी गर्दै आइरहेका छन् । नाम नखुलाउने सर्तमा एक स्टाफ नर्सले पहिलो पटक नाम निकालेका थिए । डेढ महिनासम्म पदस्थापन नहुँदा उनको उत्साह निराशामा बदलिएको बताइन् । उनले भनिन्, ‘लोक सेवाबाट पहिलोपटक नाम निकालेर निकै उत्साहित भएको थिए । तर पदस्थापन भएर काम गर्न नपाउँदा मेरो उत्साह निराशामा बदलिएको छ ।
मन्त्रालयले नियुक्ति पत्र दिनमा पनि डेढ साता लगायो, अब पदस्थापनका लागि पनि आजभोलि भन्दै अढाई महिनादेखि मन्त्रालयमा हाजिरी गराउँदै आएका कारण अन्योलमा छु ।’ स्वास्थ्य तथा जनसंख्या मन्त्रालय मधेश प्रदेशका निमित्त सचिव राजेशकुमार मिश्रले जनाए अनुसार मन्त्रालयले स्टाफ नर्सको माग संख्या ४ थियो, तर तीन पटक गरी ४/४ जना गरी १२ जना माग गरेको थियो ।
यसअघि मन्त्रालयमा कर्मचारीको अभावका कारण पदस्थापन प्रक्रियामा ढिलाइ भइरहेको कारण देखाउँदै आइरहको थियो ।
