2025-04-05
Close
2025-04-05
जनकपुरधाम । मधेश प्रदेशका मुख्यमन्त्री सतिशकुमार सिंहले छात्रवृत्ति करार सेवामा कार्यरत चिकित्सकहरूको तलब २/३ दिनभित्रै वितरण गरिने आश्वासन दिएका छन् ।
मधेस प्रदेशका प्रादेशिक अस्पतालमा छात्रवृत्ति करार सेवामा कार्यरत चिकित्सकहरूले चार महिनादेखि तलब नपाएको भन्दै आन्दोलन सुरु गरेपछि मुख्यमन्त्री सिंहले तलब वितरणको आश्वास दिएका हुन् ।
मुख्यमन्त्रीका प्रेस सल्लाहकार अनिल कुमार कर्णले जारी गरेको विज्ञप्तीमा मुख्यमन्त्री सिंहले प्रदेश सरकारको स्वास्थ्य तथा जनसङ्ख्या मन्त्रालयलाई निर्देशन दिँदै सङ्घ सरकारबाट आवश्यक बजेट प्राप्त भइसकेको उल्लेख गरेका छन् । उनले प्रक्रिया पूरा गरी दुई–तीन दिनभित्रै तलब वितरण सुनिश्चित गर्न निर्देशन दिएको पनि विज्ञप्तिमा उल्लेख गरिएको छ ।
साथै, उनले भविष्यमा करारमा कार्यरत चिकित्सक तथा स्वास्थ्यकर्मीहरूलाई तलब भुक्तानीमा ढिलाइ हुन नदिन मन्त्रालयलाई विशेष सतर्कता अपनाउन पनि भनेका छन् ।
प्रदेशका सात प्रादेशिक अस्पतालमा कार्यरत १५५ छात्रवृत्ति करारका चिकित्सकको आन्दोलनका कारण चार दिनदेखि अस्पतालको सेवा प्रभावित बनेको थियो । तर, मुख्यमन्त्री सिंहको आश्वासन पछि चिकित्सकहरूले आन्दोलन फिर्ता लिएका छन् भने काममा पनि फर्केका छन् ।
