2025-04-05
Close
2025-04-05
जनकपुरधाम । जनकपुर न्यूरो हस्पिटलका सञ्चालक डा. विजय कुमार राउतले जानकी जनकपुर यातायता प्रा.लि. का अध्यक्ष मनोज कुमार चौधरी लगायतले गरेको तोडफोड र हुलहुज्जत विरुद्ध कानुनी उपचार खोज्ने बताएका छन् । जनकपुर न्यूरो हस्पिटलमा आज विहान पत्रकार सम्मेलन गरेर उनले सो कुरा बताएका छन् ।
चैत १ गते जनकपुरधामको अन्तगृह परिक्रमा गरेर घर फर्किरहेको बस धनुषाको मालटोलमा दुर्घटना हुँदा बसमा सवार सवैजना घाइते भएका थिए । जनकपुरधामबाट राजविराजका लागि गईरहेको ना ५ ख १४४१ नम्वरको धनलक्ष्मी ट्राभल्स दुर्घटना हुँदा करिव ४२ जना घाइते भएका थिए । त्यतिवेला बस व्वसायीहरुले सम्पूर्ण विरामीको उपचार खर्च बेहोर्ने जनाएका थिए । बस व्यवसायी संघले उपचारमा कुनै कमी नगर्न हस्पिटल प्रशासनलाई आग्रह गर्दै सम्पूर्ण खर्च आफूहरुले बेहोर्ने प्रतिवद्धता समेत जाहेर गरेका थिए ।
पत्रकार सम्मेलनमा डा. राउतले ती विरामीहरु मध्ये जसरी जसरी निको हुँदै गए त्यस्तै डिस्चार्ज गरी घर फर्काएको जानकारी दिए । तर, चार पाँच जना विरामीहरु उपचारार्थ रहेको र उनीहरुको उपचार खर्च नदिई बस व्यवसायीहरु ती विरामीहरुलाई डिस्चार्ज गर्न दवाव दिएपछि हस्पिटल प्रशासनले सो बलि भुक्तानीकालागि भनेपछि शुक्रबार बेलुका एक बस मान्छे तोडफोड गरेको डा. राउतको दावी छ ।
उपचार खर्चको सम्वन्धमा आफूले पटक पटक बस व्यवसायी संघलाई आग्रह गर्दा उनीहरु फोन नउठाउने र मोवाइल समेत स्वीच अफ गर्ने गरेका कारण आफूहरुलाई समस्या भएको डा. राउतको गुनासो छ । उनले भने–हिजो हस्पिटलमाथि आक्रमण भएन, यो जनकपुरधामबासीमाथिको आक्रमण हो, म यो हस्पिटल नेपालको कुनै कुनामा सञ्चालन गर्न सक्थे तर, जनकपुरमाथिको आफ्नो स्नेह, माया र सद्भावले यहाँ हस्पिटल सञ्चालन गरेको छु । यहाँ कार्यरत कर्मचारीलाई तलव सुविधा दिनुपर्छ, हस्पिटल त्यतिकै चलेको छैन् ।
बस व्यवसायीहरुले ती विरामीहरुको उपचार खर्च नदिई त्यतिकै डिस्चार्ज गर्न भने पछि हस्पिटल प्रशासनले विल भुक्तानी गर्न भनेपछि त्यहाँ विवाद चर्किएको थियो ।
