2025-04-12
Close
2025-04-12
अप्पन जनकपुर
जनकपुरधाम । नेकपा एमाले सिरहा जिल्लाको ११ औं अधिवेशन नेकपा एमालेका सचिव तथा कोशी प्रदेश इन्चार्ज रघुवीर महासेठका घोचपेचका कारण अन्योल बन्दै गएको छ । केन्द्रीय कमिटीले मधेश प्रदेशको इन्चार्ज लिलानाथ श्रेष्ठलाई बनाएपछि आफ्नो बर्चस्व कायम गर्न उनले सिरहा जिल्लामा आफ्नो सम्पूर्ण शक्ति लगाएर लिलानाथकै गृहजिल्लामा उनलाई असफल बनाउने प्रयास गरिरहेका छन् ।
मधेश प्रदेशमा रघुवीर लिला भन्दा शक्तिशाली भएपनि उनलाई उनकै गृहजिल्लामा अससफल बनाउनकालागि अधिवेशनमा भाडभैलो मचाउन लागेको एमाले सिरहाका नेताहरुको आरोप छ ।
चैत २६, २७ र २८ गते अधिवेशनको समय तोकिएको थियो । तर नेतृत्व चयन सकसपूर्ण बनेपछि अधिवेशन लम्बिएको छ । बिहीबार साँझसम्म सर्वसम्मत ढंगले नेतृत्व चयन गर्ने प्रयास गर्दा पनि सम्भव भएन् । स्रोतका अनुसार सर्वसम्मत गर्ने पक्षमा लिला देखिएपनि रघुवीर पक्ष भने चुनावको पक्षमा देखिएका छन् । सर्वसम्मत नेतृत्व चयन गर्दा पार्टी भित्र अन्तरकलह, असन्तुष्टि नहुने भएका कारण सर्वसम्मत नेतृत्व चयनमा लिला लागेका छन् ।
नेतृत्व चयनको जिम्मा गंगाप्रसाद यादवको अध्यक्षतामा गठित पाँच सदस्यीय अध्यक्ष मण्डललाई दिइएको छ । अध्यक्ष मण्डलले सर्वसम्मत नेतृत्व चयनको अधिकार सुम्पिन अध्यक्षका आकांक्षीहरुलाई आग्रह गर्दा पनि रघुवीर पक्ष भने निर्वाचनमा जानुपर्नेमा आक्रामक देखिएका छन् ।
मधेश प्रदेशको ८ जिल्लामा रघुवीर धनुषा र सिरहामा बढी शक्तिशाली देखिएको र लिलाको गृह जिल्ला समेत सिरहाका कारण लिलालाई तेरो जिल्लामा मेरो अधिकार भाषयका साथ रघुवीर आफ्नो सक्रियता बढाएको एमाले नेताहरुको गुनासो छ । सिरहा लिलाको गृह जिल्ला छ भने सिरहा जिल्ला रघुवीरको ससुराली छ ।
अध्यक्ष पदकालागि अशोक यादव, फुलेश्वर नायक, रामकुमार साह र रामविलास साह आकांक्षी देखिएका छन् । सर्वसम्मत भए पार्टी बलियो हुने, नेता कार्यकर्ता बीच आपसी सद्भाव रहने र आन्तरिक कलह नरहने भएका कारण निर्वाचन भन्दा सर्वसम्मत नै उपयुक्त रहेको भन्दै लिला खेमा आफ्नो जिल्लामा एमालेलाई बलियो बनाउने प्रयासमा रहेका कारण अधिवेशनमा ढिलाई भएको एमाले नेता कार्यकर्ताको बुझाई छ । अधिवेशनका लागि निर्वाचन अधिकृत तोकिएका विजय सुब्बाले सर्वसम्मतको प्रयास गरिरहेकाछन् ।
स्रोतका अनुसार रघुवीरकै इसारामा एमाले ११ औं अधिवेशनको उद्घाटन सत्रमा पार्टी अध्यक्ष केपी शर्मा ओली आफ्नो मनतव्य राख्दै गर्दा एक हुल व्यक्ति उद्घाटन स्थलबाट बाहिरिएका थिए ।
