2024-11-23
Close
2024-11-23
विपिन कुमार यादव, जनकपुरधाम : प्रदेश २ का आन्तरिक मामिला तथा सञ्चार मन्त्री ज्ञानेन्द्रकुमार यादव र राज्यमन्त्री सरोजसिंह कुशवाहाले राजीनामा दिएका छन् ।
नेकपा (माओवादी केन्द्र)लाई सरकारमा सहभागी गराउन सत्तारुढ जसपा अध्यक्ष उपेन्द्र यादवले दुवैजनालाई राजीनामा गर्न लगाएका हुन् । दुवै मन्त्रीले मुख्यमन्त्री लालबाबु राउतलाई राजीनामा पत्र बुझाइसकेको स्रोतले जनाएको छ ।
खाली भएको मन्त्रालय माओवादी केन्द्रले पाउने भएका छन् । माओवादी संसदीय दलका नेता भरत साह मन्त्री र सांसद रुबी कर्ण राज्यमन्त्री बन्दैछन् । साह महोत्तरी क्षेत्र १ (१) बाट निर्वाचित र कर्ण सप्तरीकी समानुपातिक सांसद हुन् । आजै दिउँसो ३ बजे शपथ ग्रहणको समय तोकिएको छ ।
‘हिजोसम्म कृषि र अर्थमन्त्रालयमध्ये कुनै एक मन्त्रालय दिने कुरा थियो’, माओवादी केन्द्रका प्रमुख सचेतक दिलिप साह भन्छन्, ‘तर आज आन्तरिक मामिला तथा सञ्चार मन्त्री दिने कुरा सुनेँ ।’ – नेपाल प्रेस
