2024-11-23
Close
2024-11-23
जनकपुर : विश्व प्रसिद्ध जानकी मन्दिरको सौन्दर्यलाई नै कुरुप बनाउने गरी परिसर भित्र राखिएका होर्डिङ्ग बोर्ड हटाइएको छ। व्यवसायिक र राजनीतिक प्रयोजनका होर्डिङ्ग बोर्डहरु युवा अभियान्ताले हटाइ दिएका हुन्।
ऐतिहासिक र पुरातात्विक महत्वको ख्याल नगरी मन्दिर परिसरमा पछिल्लो समय मुख्यमन्त्री लालबाबु राउतको फोटोसहितको ठूलो होर्डिङ्ग बोर्ड पनि राखिएको थियो।‘हामीले पटक पटक मुख्यमन्त्रीज्यूलाई होर्डिङ्ग बोर्ड हटाउन सन्देश दियौं तर, बेवास्ता गरियो,’ युवा अभियानी सरोज मिश्रले भने, ‘विश्व सम्पदामा सूचीकृतका लागि सिफारिस भएको जानकी मन्दिरमा यसरी व्यापारिक प्रयोजनको बोर्डहरु लगाएर कुरुप बनाउन खोजिएपछि हामीले हटाएका हौँ।’
शनिबार बिहान जानकी मन्दिर पुगेका युवा अभियान्ताहरुको एक समूहले अनावश्यक पोस्टर पम्पलेटहरु हटाएका हुन्। मन्दिरको गरिमाको ख्याल गरि धार्मिक महत्वका मात्र पोस्टर, पम्पलेट र होर्डिङ्ग बोर्ड लगाउन उनीहरुले आग्रह समेत गरे। आगामी दिनमा धार्मिक नगरि जनकपुरधामको कुनै पनि मठमन्दिरका पर्खालहरुमा व्यवसायिक प्रयोजनका प्रचार प्रसार सामग्री टाँसेमा कानुनी उपचारमा जाने युवाहरुले चेतावनी समेत दिएका छन्। निहित स्वार्थ पूर्तिका लागि जथाभाबी टाँसिने व्यवसायिक प्रयोजनका पोस्टर, पम्पलेटहरुका कारण सम्पदाहरु कुरुप बन्दै आएको छ।
