2024-11-05
Close
2024-11-05
जनकपुरधाम । जनकपुर बमकाण्डमा दोषी ठहर भएका पूर्वराज्यमन्त्री सञ्जय साहलाई उच्च अदालत जनकपुरबाट फेरि राहत मिलेको छ । ज्यान मार्ने षडयन्त्र गरेको मुद्दामा उनले यसअघि पाएको जन्मकैद खारेज गरी ११ वर्ष कैद सजाय तोकिएको हो ।
सोमबार न्यायाधीश धीरबहादुर चन्द र रमेश ढकालको संयुक्त इसलासले साहलाई ११ वर्ष कैद सजाय सुनाएको रजिष्टार खड्गराज अधिकारीले जानकारी दिए । जिल्ला अदालत धनुषाले ०७५ मा सोही मुद्दामा साहलाई जन्मकैदको फैसला सुनाएको थियो ।
साहमाथि दुईवटा मुद्दा थिए । अर्को मुद्दामा उनलाई बम काण्डको मुख्य अभियुक्त ठहर गर्दै जिल्ला अदालतले १२ वर्षको कैद सजाय सुनाएको थियो । त्यसलाई पनि उच्च अदालत जनकपुरले केहि दिन अगाडी मात्रै घटएर सात वर्षमा झारेको छ ।
मिथिला राज्यको माग गर्दै जनकपुरको रामानन्द चोकमा बसेको धर्नास्थललाई लक्षित गरी ०६९ वैशाख १८ मा बम विस्फोट गराईंदा ५ जनाको मृत्यु भएको थियो । सो घटनामा दर्जनौं व्यक्ति घाईते भएका थिए । उक्त घटनाका योजनाकार साह थिए ।
साह हाल काठमाडौंको नख्खु जेलमा छन् । धनुषा क्षेत्र नम्बर ३ बाट दुई पटक सांसदमा निर्वाचित उनी बम काण्डमा संलग्नता देखिएपछि प्रहरीले भारतको दिल्लीबाट पक्राउ गरी ल्याएको थियो ।
