2024-11-24
Close
2024-11-24
जनकपुरधाम : सीता-राम विवाहपञ्चमी महोत्सवको पाँचौं दिन आज जनकपुरको ऐतिहासिक एवं धार्मिक गंगासागर पोखरीमा मटकोर सम्पन भएको छ ।
सीता- राम विवाहको पूर्व सन्ध्यामा जानकी मन्दिरबाट झाँकीसहित साधुसन्त र श्रद्धालुले गंगा सागरको किनारमा पुगेर मटकोर विधि गरिएका हुन् । मटकोर सकेपछि प्रसाद स्वरुप भिजाएको चना, चामल र खाने तेल वितरण गरिएको छ । शुद्धिकरणका लागि मटकोर गर्ने परम्परा रहेको साधुसन्त बताउँछन् ।
मैथिली परम्परा अनुसार हुने विवाहको सबै विधि सीता-राम विवाह अर्थात् विवाह पञ्चमीमा गरिन्छ । मटकोरको क्रममा जानकी मन्दिरमा मडबा (बेदी) बनाउन गंगासागर पोखरीको माटो लगिएको छ । मडबामै सीता-राम विवाहको सबै विधि पुरा गर्ने चलन छ ।
मटकोरमा हजारौं श्रद्धालु सहभागी थिए । सीता- राम विवाहको पूर्व संध्यामा गरिने मटकोरमा सहभागी हुनेको मनोकांक्षा पुरा हुने जनविश्वास छ । मटकोरका क्रममा गरिएको गितनादले त्रेतायुगमा जस्तै आज सीता मैया र राम भगवानको विवाह भ इरहेको महसुस भयो- जनकपुरकी राधा साहले सुनाइन् ।
विवाह महोत्सव अन्तर्गत पहिलो दिन नगर दर्शन, दोस्रो दिन फूलबारी लीला, तेस्रो दिन धनुष यज्ञ र चौथो दिन तिलकोत्सव कार्याक्रम मनाइयो । आज पाँचौं दिन गंगासागर पोखरीमा मटकोर मनाइएको छ ।
छैठौं दिन भोली स्वयम्बर तथा शुभविवाह (विवाह पञ्चमी) हुन्छ । सातौं दिन राम कलेवा पश्चात विवाह पञ्चमी विधिवत सम्पन्न हुनेछ । जनकपुरमा विवाह पञ्चमीको रौनक देखिएको छ । श्रद्धालुहरु आउनेक्रम जारी छ ।
