2024-12-22
Close
2024-12-22
जनकपुरधाम । जनकपुरबाट बेपत्ता भएको भनिएकी बालिकाको अपहरण भएको खुलेको छ । अपहरणमा परेकी ४ बर्षीया बालिकाको धनुषा प्रहरीले सकुशल उद्धार गरेको छ ।
जनकपुरधाम उपमहानगरपालिका वडा नं. १६ स्थित पुलचोकबाट बिहीबार साँझ ४ वर्षीया सृष्टि मण्डल हराएकी थिइन् । उनको अपहरण गरेको पाइएको र शुक्रबार उद्धार गरिएको धनुषा प्रहरीका प्रमुख वसन्त रजौरेले जानकारी दिए ।
उनका अनुसार बालिकालाई धनुषाको विदेह नगरपालिका वडा नं. ८ बाट उद्धार गरिएको छ । अपहरण गर्ने व्यक्तिमध्येका एकजनाले आफ्नो दिदीको घरमा बालिकालाई राखेको पाइएको बस्नेतले बताए ।
बालिकाको खोजी गर्न धनुषा प्रहरी प्रमुख एसपी बसन्त रजौरेकै नेतृत्वमा टोली खटिएको थियो । ‘हामी बालिकाको उद्धार गरिसकेका छौं, बालिका पूर्ण रुपमा स्वस्थ्य छन्’ उनले भने, ‘प्रकृया पुर्याएर परिवारजनको जिम्मा लगाएकाछौं ।’
अपहरणकारीलाई नियन्त्रणमा लिने क्रममा ५ राउण्ड हवाई फायर गर्नुपरेको प्रहरीले जनाएको छ । अपहरणकारी भाग्दै गरेको अवस्थामा उनलाई नियन्त्रणमा लिन हवाई फायर गर्नुपरेको धनुषा प्रहरी प्रमुख एसपी बसन्त रजौरेले बताए ।
बालिकाको अपहरण गरेर अपहरणकारीले रु १५ लाख फिरौती मागेको पाइएको बस्नेतले बताए । अपहरणमा संलग्न भएको आशंका प्रहरीले पाँचजनालाई नियन्त्रणमा लिएको छ । यस विषयमा अन्य अनुसन्धान भइरहेको प्रहरीले जनाएको छ ।
