2024-11-26
Close
2024-11-26
काठमाडौं । गत बैशाख १८ मा सरकारले धिरजप्रताप सिंहलाई नेपाल प्रहरीको महानिरीक्षक (आईजीपी) नियुक्ति गरेपछि बिदा बसेर सरकारविरुद्ध मुद्दा लडेका नेपाल प्रहरीका अतिरिक्त महानिरीक्षक (एआईजी) विश्वराज पोखरेलले अन्ततः राजिनामा दिएका छन् ।
एआईजी पोखरेलले आईजीपी नियुक्तिमा असन्तुष्टि जनाउदै दायर गरेको रिटमा अन्तिम सुनुवाइ गर्दै गत शुक्रबार सर्वोच्च अदालतले रिट खारेज गर्ने फैसला गरेसंगै सोमबार उनको राजिनामा आएको हो ।
सोमबार प्रहरी प्रधान कार्यालयको प्रदेश प्रहरी समन्वय विभागमा हाजिर भएका एआईजी पोखरेलले भोलि (मंगलबार) देखि लागू हुने गरी प्रहरी प्रधान कार्यालयको कर्मचारी प्रशासन शाखामा राजिनामा बुझाएका हुन् ।
अब नेपाल प्रहरी प्रधान कार्यालयले उनको राजिनामा सनाखत गरेर स्वीकृतिको लागि गृह मन्त्रालय पठाउने छ । एआईजीको ५६ बर्षे उमेरहदका कारण १८ दिनपछि (असार २० मा) अवकाश पाउन लागेका पोखरेलको राजिनामा गृह मन्त्रालयबाट मन्त्रिपरिषदमा पेश हुनेछ । एआईजीको राजीनामा मन्त्रिपरिषदले स्वीकृत गर्नुपर्ने व्यवस्था छ ।
